Uwuserukira Ubufaransa mu gihugu ca Niger yirukanwe ubutarariye n’umurwi w’abasirikare bafashe ku nguvu ubutegetsi muri Niger biciye mw’itangazo basohoye bategeka igipolisi kwirukana Ambasaderi Sylvain Itte, bavuga ko atagikingiwe biciye muri diplomasi kandi ko impapuro ziha uburenganzira bwo kuba muri Niger umuryango wiwe, n’izindi karata za diplomasi zose, Niger yazisubije. Bamwirukanye inyuma yo kumuha amasaha 48 ariko nyanka gutaha. Aho bigeze gushika iki gihe nuko gipolisi c’igihugu ca Niger cahawe amabwirizwa yo gukoresha inguvu mu gusohora ku nguvu Sylvain Itté yaserukira i Niamey igihugu c’ubufaransa.
Mw’ikete ubushikiranganji bujejwe imigenderanire bwa Niger bwarungikiye ubw’imigenderanire bw’Ubufaransa, bwabamenyesheje ko inyuma y’igihe ntarengwa c’amasaha 48 yari yahawe kugira ngo akinjure maze igihugu c’Ubufaransa kikanka kumukurayo ko atagifise uburenganzira bukingira umu diplomate kandi ko bwasavye inzego z’umutekano ko avanwayo ku nguvu.
Umushikiranganji ajejwe imigenderanire y’Ubufaransa n’ayandi makungu, yamenyesheje yuko ata ruhusha bafise bwo kwirukana uwo mutegetsi ku butaka bwa Nijeri. “Ubufaransa buriko bukurikiranira hagufi umutekano wa ambasade yabwo muri Nijeri”.
Ambasaderi Sylvain Itte basubiye kumwirukana inyuma y’uko mu ndwi iheze bari bamuhaye amasaha 48 yo kuba yavuye muri ico gihugu, ariko ntiyahava. Igihe yihoza ako kamo, Emmanuel Macron yamushigikiye avuga ko Ubufaransa butemera abatembagaje ubutegetsi nk’indongozi za Niger.
Mwomenya yuko Ubufaransa bufise abasirikare bagera ku 1500 bari muri Nijeri gufasha kurwanya imirwi y’iterabwoba itandukanye irimwo uw’abajihaditse ukomoka kuri Al Qaeda intagondwa ziyitirira idini rya kisilamu.
