Muri iyi minsi ya none biravugwa ko hariho ingo nyishi zisigaye zisambuka kubera habaye ukwahukana . Imvo zikaba ari ukutumvikana kuri iki canke kiriya,akarenganyo,ukudahuza mu mpande nyinshi. Bibaye uko ,umugabo canke umukenyezi aritura ubutungane asaba gutandukana n’uwo bari barashimanye,gutyo umuryango ugatandukana kandi wabwirizwa kuguma mu bumwe.
Ukwahukana ni bishasha mu Burundi ? Oyaa
Niho abantu bamwe babibafata nk’ikiza cateye. Muri ino nkuru, dukurikirane umwihwezo wa Alexandre Shemezimana ,umuhinga mu vyigwa vy’imibano muri Kaminuza y’uburundi. Kubwa Alexandre Shemezimana, ukwahukana na kera vyariho ariko vyaboneka nabi kandi hariho ivyo imiryango yakora mu gukingira uwo muryango .
Yisunze ubushakashatsi bwakozwe na Jean Baptiste BIGANGARA mu mwaka w’1986 « Pour une ANTHROPOLOGIE DE LA FAMILLE » aremeza ko na kera umugabo yashobora kurekera munzu akaja kubana n’uwundi mugore mushasha, kubw’ivyo bikorwa, imvo zabituma ni igihe umugore yaba adashoboye ibikorwa vyo mu rugo nko kurima canke ibindi.
Iwabo w’umugore iyo babimenye kare barashobora kurungika murumuna w’umugore kugira azomufashe ivyo bikorwa.
Umugore nawe nyene yarashobora guheba umugabo kubera imvo zitandukanye maze agasubira i muhira. Muri ico gihe ,haraho umugabo yaza kumutora iwabo ,bavyita gucura. Ariko rero ikibano nticabibona neza ariko vyashika rimwe na rimwe umuryango ukamusubiza mu rugo bitwaje ngo ni uko zubakwa. Muri kubu rero iyo ngendo ya niko zubakwa iriko iragabanuka kandi ingo zirasambuka kubwinshi .
Igisubiramuhira, izina risa n’igitutsi
Umugore kare vyaramugora kwahukana n’umugabo kubera ko iyo umugore yirukanywe ntiyatahurwa i muhiira no mu kibano ,baramutwenga ngo ni igisubiramuhira, yananiwe no kwubaka, vyaragorana kandi ko aronka umugabo.
Hari ivyahindutse, tumenye gusoma ibihe
Ubu umugore arashobora kwibeshaho mu gihe urugo rutagenze uko yavyifuza kuko hari ababa bafise ubuzi bubaha amafaranga . Kubwa Shemezimana, ibihe vyarahindutse, hagati y’umugabo n’umugore ubu bompi barakora bagahuriza hamwe kugira umuryango ubeho bitandukanye na kera umugabo niwe yabazwa vyose mu bitunga urugo kandi niwe yafata ijambo rya nyuma. Ariko ubu n’umugore aragira ico avuze mu vy’urugo kuko nawe aragira uruhara mu kubirondera iyo rero umugabo aciye agomba kugumana bwabubasha bwa kera yari afise, umugore ntabimwerere bica vyanka. Umugore arondeye kugira ijambo muvy’urugo umugabo ntabimwemerere naho nyene bica vyanka. Mu rugo rero bose bahamagarirwa kumenya ko ibintu vyahindutse wa mugore wa kera yaguma muhira agatega ivyo umugabo amuzaniye vyarahindutse,kuko umugore nawe arafise ivyo akora ; nawa mugabo wa kera yaronderera urugo akazanira umugore ivyo yarondeye navyo siko biri, vyarahindutse, ntakihari.
Bavuga ngo umugabo ni umutwe w’urugo. Nukumenya ko umugore nawe ari umutima w’urugo. Gutyo abubakanye bamenye ko ari magiriranire, bubahane.
