Kuva ku munsi wa mbere gushika ku wa kane, ubunywero bwemerewe kuvuza gusa utuziki tworoshe (musiques douces) gushika isaha zine z’ijoro. Mu minsi irangiza indwi (week-end), abafise ubunywero baremerewe kuvuza umuziki ushushe kandi cane ariko ntibarenze igihe c’isaha zitanu z’ijoro. Izo ngingo ntiziraba abafise inyubakwa zidasohora amajwi (salles insonorisées) co kimwe n’abari ku kiyaga hategereye imihana (plages)
Ivyo ni ivyaraye bipfundikiwe mu nama umukuru w’igisagara ca Bujumbura ari kumwe n’abajejwe intwaro n’umutekano baraye bagiranye, kuri uyu wa 14 myandagaro, na bene ubunywero.
Jimmy Hatungimana, umukuru w’igisagara ca Bujumbura ,avuga ko ivyo bipfunditswe kubera ko bimaze kuboneka ko hari abavuza imiziki cane bikabuza amahoro abashaka kwiruhukira.
Rénovat Sindayihebura arongoye komine ya Mukaza amenyesha ko adahengeshanya kwakira amaterefone y’abamuhamagara bamutura ikibazo c’uko vyanse ko baryama kubera imiziki y’ububare bubegereye.
Umwe mu bafise akabare mu Ngagara ya 2 we abona ko ivyo vyose biva kukudahana. Agira ati :”Jewe simbona ko ivyo vyari bikwiye kudufata umwanya tubivugako. Ntihenze ingingo zarigeze gufatwa, amasaha arashingwa . Amategeko ahana abo babangamira uburenganzira bw’ abandi aratomoye, none habura iki ngo bahanwe ?”
