Kuruyu wa mbere, Umwami w’Ubwongereza, Charles III arikumwe n’umwamikazi wiwe Camilla bashitse mu gihugu ca Kenya mu rugendo rwiwe rwa mbere ashikiriye ayo mabanga muri ico gihugu kiri mw’ishirahamwe Commonwealth rigizwe n’ibihugu bivuga ururimi rw’icongereza. Umwami Charles III w’Ubwongereza yemanze “ibikorwa vy’ubukozi bw’ikibi bw’agahomerabunwa kandi bidafise insiguro vyakorewe Abakenya” mu rugamba rwabo rwo kurondera intahe yo kwikukira.
Mu kwishura kw’ijambo ryiwe, Perezida William Ruto wa Kenya yashimagije ubutwari bw’Umwami bwo gushobora kwemanga “uku kuri kutaryoheye ugutwi”.Umukuru w’igihugu ca Kenya yabwiye Umwami ko intwaro ya gikoloni yabaye “iy’agahotoro n’ubugome ku Banyafrika” kandi ko “hari vyinshi bitegerezwa gukorwa kugira ngo haboneke indishi nyayo”.Umwami Charles III yagendeye imva y’umurwanyi yaguye ku rugamba, atamenyekanye mu kibanza citiriwe Uhuru. Iri ni ijambo ry’igiswahili rivuga “ubwigenge”.
Ariko n’ubwo Umwami atasavye imbabazi, ijambo ryiwe yavugiye kuri State House (ibiro vy’umukuru w’igihugu ca Kenya) ryabaye ikintu gikomeye co kwemanga ku mugaragaro amakosa yakozwe mu gihe c’ubukoloni.
Urugendo rw’Umwami Charles III n’Umwamikazi Camilla rubaye mu gihe Kenya iriko ihimbaza imyaka 60 irangiye, ishikiye intahe yo kwikukira, Umwami yabwiye abo bari kumwe ati: “Ni ikintu c’ingirakamaro kuri jewe kurondera gutahura aya makosa, kandi ko mbonana n’abo yagizeko ingaruka zikomeye ku buzima bwabo n’ikibano”
Mwomenya yuko igihugu ca Kenya n’Ubwongereza bifitaniye imigeraniranire myiza. Yamara rimwe na rimwe iyo migenderanire yarabayemwo ibibazo kubera urugamba Kenya yamazemwo igihe kirekire rwo kwikurako intwaro ya gikoloni y’Ubwongereza. Abanyakenya ibihumbi n’ibihumbi barasize ubuzima muri urwo rugamba.
