Amatora 2025: Imyiyamamazo yuguruwe icese n’Umukuru w’Igihugu.

Nestor Girukwishaka yaserukiye imigambwe itavuga rumwe n’umugambwe uri ku butegetsi akaba anarongoye umugambwe CNL, yashimiye Umukuru w’igihugu ku kuba yatunganije ivyo birori, akemeza ko ari imbonekarimwe. Agashima kandi ko amatora ngo ariko aratunganywa neza ashobora kubera akarorero amakungu. Nestor Girukwishaka yamenyesheje ko iyo migambwe yaserukiye izogira imyiyamamazo idahungabanya amahoro n’umutekano. Yasavye abajejwe intwaro kuzofata kumwe abazokwiyamamaza. Yasavye kandi ko abazokwiyamamaza bohabwa umwanya ungana ku Nsamirizi n’Imboneshakure vy’igihugu n’ibindi binyamakuru vya Leta.

Révérien Ndikuriyo, Umunyamabanga mukuru w’umugambwe uri ku butegetsi, CNDD-FDD ari na we yaserukiye imigambwe ishigikiye uwuri Ku butegetsi, yashimiye Umukuru w’igihugu kuba yishikiye gutanguza icese ikiringo c’imyiyamamazo. Avuga ko ata nkeka ko amatora azogenda neza, agasaba abazohiganwa bose kuzorangwa n’inyifato ibereye. Révérien Ndikuriyo yamenyesheje ko muri CNDD-FDD biteguriye kutazokoresha imvugo zikomeretsa, yemeza ko abanywanyi b’uwo mugambwe batekanye mu ntara zose no mu mitumba yose. Umunyamabanga mukuru wa CNDD-FDD yasavye abanyamigambwe kuja hamwe kugira bubake igihugu cabibarutse, no kwirinda kurabana ay’ingwe hamwe n’imvugo zibiba urwanko. Yatomoye ko amahiganwa ya poritike abantu bataba bakwiye gufatana nk’abansi, kandi ko kubisikanya Ku butegetsi bw’igihugu vyamaze gutsimbatara mu mugambwe CNDD-FDD.

Umukuru w’igihugu Evariste Ndayishimiye yataguje ivyo bikorwa nyezina, yasavye abiyamamaza kuta zosanga abanyagihugu bari ku kivi mu ntumbero yuko bosanga babatesheje akazi, kugira ibimenyetso ntihazohave haboneka abantu baza kubatobera, ibibanza bikamenyeshwa kare kugira abajejwe intwaro babafashe kubitegura hakiri kare, yabahamagiriye kubikora mu rupfasoni bakirinda gutukana canke gutyoza iyindi migambwe barikumwe mw’ihiganwa. Yasave ibinyamakuru gufata abiyamamaza bakabaha umwanya ungana bose bakinegesera bidasanzwe ivyo bazoshikiriza vyose.