Faustin Ndikumana arongoye ishirahamwe Parcem yatanze umuco ku vyerekeye ibigwanisho biherutse gutorwa ku muhana iwe i Kinyami mu Ntara ya kera ya Ngozi, kuri uyu wagatanu Ruheshi 2026. Ivyibonekeje kubunywero bwiwe yaciye avyita irementanya kugira ngo afatwe yagirizwa guhungabanya umutekano w’igihugu ariko yibukije ko urugamba rwiwe atari urw’ibigwanisho ahubwo ari urugamba rw’ivyiyumviro, intwaro ibereye, guhindura ingendo yifashishije ivyo yize vyoteza imbere igihugu.
Yagize, ati : “Hari ku wa 17/5/2026″. Mu gihe hari haheze imisi hari ikibazo c’umuyagankuba biturutse ku cuma ca Regideso cari cahiye, haje abantu batigeze bamenyekana mu bunywero nk’abandi bose. Ariko baje batekeye inkoho, grenade, umwambaro n’ibirato vya gisirikare bishasha kugira ngo igipolisi giheze kize gusaka mu bucagucagu”
Faustin Ndikumana abandanya amenyesha ko Imana yakinze kuko uwujejwe umutekano ndetse n’abandi bakora muri ubwo bunywero bahavuye babibona hakiri kare maze babona gutabaza inyamiramabi nazo zirahashika nk’igihe c’isaha zitanu z’ijoro.
Uwo arongoye Parcem yavuze ko ikibazo ciwe kizwi mu giporisi mbere ko n’igiporisi cemeza ko catabajwe n’abakozi bakora muri ubwo bunywero. Ku bw’ivyo, Ndikumana yasavye ubutungane kurekura urwaruka rukora muri ubwo bunywero rupfunzwe ku mvo z’amatohoza kuko ku bwiwe, ntiyumva ingene abatabaje aribo baca bafungwa.
“Kuba mfise abansi ntibinca intege kandi ntibizombuza urugamba rwanje rwo kutavuga ibitagenda neza kugira ngo bikosorwe” niko Faustin Ndikumana yabandanije avuga
Yaboneyeho gutera akamo indongozi gukora ibishoboka vyose iyo ngendo igahinduka, ubutungane bagakora akazi kabwo.
Gushika ubu ntarwego rw’intwaro ruragira ico rubivuzeko!
