Amadou yaririmvye “Un Dimanche à Bamako” yapfuye ku myaka 70.

Amadou Bagayoko, umuririmvyi n’umucuraranzi w’umugwi w’abaririmvyi bo mu gihugu ca Mali Amadou et Mariam, yapfuye kuri uwu wa gatanu igenekerezo rya 04 Ndamukiza i Bamako, afise imyaka 70, ahitanwe  n’ indwara batashimye gushira ahabona. Amadou Bagayoko yamenyekanye cane ku rukurikirane basohoye bise “Un Dimanche à Bamako” ,uwo murwi yarimwo watangujwe n’umukenyezi wiwe Mariam Doumbia, bamenyekanye cane gose mu 2004. Amadou asize abana 3 n’umukenyezi.

Urwo rukurikirane (Album) rwasohowe na Manu Chao, yatumye  Amadou na Mariam umugore wiwe bashika ku rubuga rw’isi yose, amajwi avanga imigenzo ya Mali, rock, funk na electro. Indirimbo y’imbere murirwo rukurikirane yitwa Dimanche à Bamako, iguma ari indirimbo y’agaciro mu ndirimbo zabo. Iyo ndirimbo ntiyakunzwe cane gusa ahubwo yararonse kandi agashimwe k’umuziki mu 2005, mu rwego rw’umuziki kw’isi yose. Ico gikorwa c’umuziki carahinduye cane abo babiri, kuko bari bamaze gutera imbere mu Bufaransa mu 1998 n’indirimbo yabo yitwa “Je Pense à Toi”. Ariko mu mwaka w’2004 niho ubuzima bwabo bwatera imbere kw’isi yose.

Amadou na Mariam ntibari bazwi gusa kubera ubuhinga bwabo budasanzwe. Bompi bari impumyi, bahuriye mu 1976 mu kigo c’abakiri bato b’impumyi i Bamako muri Mali. Muri iryo koraniro niho havutse inkuru y’urukundo n’umuziki yobaye ikimenyetso c’amateka y’isi y’umuziki. Uguvangura kwabo kw’indirimbo za kera z’Afrika n’amajwi y’iki gihe kwatumye abantu benshi bakunda umuziki wo kw’isi yose, bituma baba aba ambasaderi b’umuziki wa Mali ku rwego mpuzamakungu.

Uko ari babiri bakoranye kandi n’abaririmvyi bazwi kw’isi yose, harimwo Damon Albarn umuyobozi nyene Blur na Gorillaz, bahawe gushika mu gice ca mbere muri Coldplay mu 2009 na U2 mu 2011. Mu 2009, baririmvye muri Prix Nobel mu birori imbere ya Barack Obama yatwaye Amerika hari igihe kidasanzwe kuribo vyerekanye cane agaciro bafise mu gufasha kuryohera abantu ku rwego rw’isi yose. Ingendo mpuzamakungu n’indirimbo zabo zitazokwibagirana vyatumye bakora indirimbo zo kuremesha abari mubihe bimeze nabi bari kumwe na Stevie Wonder na David Gilmour, kandi bagashikira abakunzi amamiliyoni kw’isi yose.