Mu ntumbero yo gukomeza umutekano wo mu kirere ca Ukraine, haraye habaye umubonano ukomeye hagati ya Emmanuel Macron hamwe na Volodymyr Zelensky ku musi wa mbere, mu rugendo rwiwe rwa 9 mu Bufaransa kuva intambara itanguye, hasinywe amasezerano y’igisirikare yerekeye ukwitegurira kugura indege zitari munsi ya 100 zo mu bwoko bwa Rafale, amasezerano Kiev yita ay’amateka.
Amasezerano yarashitsweko, kuri uyu wa mbere igenekerezo rya 17 Munyonyo, Emmanuel Macron hamwe na Volodymyr Zelensky barasinye amasezerano ajanye n’ibikoresho vya gisirikare, yabereye ku kibuga c’indege c’i Villacoublay hafi y’i Paris. Ayo masezerano yiswe ko ari “ay’amateka” n’umukuru w’igihugu c’Ukraine, kuko agenewe gukomeza indege z’intambara hamwe n’uburyo bwo kwirwanira mu kirere kwa Ukraine.
Ni amasezerano y’ubwumvikane hagati yivyo bihugu ajanye nu ku mugambi wo kugura mu bihe biri imbere, nko ku rugero rw’indege za Rafale ijana (100), nk’uko vyemejwe n’umukuru w’igihugu c’Ubufaransa Emmanuel Macron mu kiganiro n’abamenyeshamakuru bari kumwe n’umukuru w’igihugu ca Ukraine.Ku musi w’Imana, ku rubuga rwa X, Volodymyr Zelensky yavuze ko ari “amasezerano y’amateka” ategekanya “ugukomeza cane” igisata c’indege z’intambara, uburyo bwo kwirinda ibitero vyo mu kirere, hamwe n’ibindi bikoresho vya gisirikare vy’igihugu ca Kiev.
Nk’uko bivugwa n’ibiro vy’umukuru w’iguhugu c’ Ubufaransa, ayo masezerano ni uburyo bwo gushira ubuhinga bw’Ubufaransa mu vy’ikoreshwa rya gisirikare mu gukomeza umutekano w’Ukraine no kurinda ikirere cayo mu gihe hamaze igihe Uburusiya bubatera n’intambara ikibandanya.
Umukuru w’igihugu c’Ukraine yarasubiriye gutera akamo ku wa gatandatu asaba ko hoboneka ibindi bikoresho vyo kwirwanira mu kirere, inyuma y’uko Uburusiya bwakoze ibitero bikomeye ku gihugu ciwe. Mu rukurikirane rw’ivyo bitero hagati y’ijoro ryo ku w’Imana n’uwa mbere, abahinga mu vy’umutekano muri Kharhiv (mu buseruko bwa Ukraine, batangaje ko abantu batatu bishwe.Aya masezerano, ategekanijwe kurangura mu kiringo c’imyaka cumi, arimwo amahirwe yo gushikirizwamwo amasezerano y’imbere y’igihe yerekeye ukugura ibikoresho bishasha vya gisirikare vy’Ubufaransa n’Uburusiya.
Nk’uko ibiro vya Élysée vyabitangaje, ivyo bikoresho birimwo indege zo mu bwoko bwa Rafale zigera kw’ijana, hamwe n’ibirwanisho bizigendana, ariko kandi birimwo n’ibindi bikoresho vya gisirikare, harimwo uburyo bushasha bwo kwirinda ibitero vyo mu kirere SAMP-T buriko buratunganywa, amasisteme ya radar, hamwe n’indege zitagira umudereva (drones).
